Guolleváriiddikšunmávssuin čoggui 10,7 miljon euro

Lassáneapmi boahtá earret eará das, ahte ain boarrásut guollebivdit leat geatnegahtton máksit guolleváriiddikšunmávssu. Riikkabeaivvit alidii máksogeatnegásaid badjeahkerájá viđain jagiin jagi 2023.

Ahkerájá nuppástus ii goittotge čilge buot lassáneami. Ovdamearkan vuollel 25-jahkásaččaid ahkejoavkkus lotno mávssuid eanet go goassige ovdal. Lassin 40-49-jahkásaččaid ahkejoavkkus fáhtejedje maiddái ođđa olahusa. Dušše 55-64-jahkásaččaid ahkejoavkkus leamašan áicamis maŋosmannan jo moatti jagi áigge. 

– Lassáneapmi lea lunddolaččat buorre ovdánanhálti, muhto dáláárvvoštallamiid mielde dárbu livččii lassánit vel sulaid njeljiin miljovnnain, vai guolleváriiddikšun livččii stáđis vuođu alde, guollebivddu spesiálaáššedovdi Jaakko Haapakoski Meahciráđđehus dadjá. 

Guolleváriiddikšunmávssuin doarjut guolástanlága guovddáš mihttomeari guliid lunddolaš eallingierddu ovddideapmi. Resurssaiguin ruhtadit jahkásaččat guollečáziid suvdilis ávkkástallama ja dikšuma plánema ja ollašuhttima, guolástanbearráigeahču ja guolledoallosuorggi rávvema. Ovdamearkan guolledoalloguovlluid vuođđoruhtadeapmi boahtá eanaš guolleváriiddikšunmávssuin sierra hámiiguin: oppalašdoarjagis, ovddidanmearreruđain ja oamasteaddjibuhtadusain.

– Guolleváriiddikšunmávssuin guollebivdit oassálastet konkrehtalaččat guollečáziid ja guollebivddu boahttevuođa dorvvasteapmái. Juohke máksu ovddida guolleváriiddikšuma, muhto lea dajakeahttá čielggas, ahte jahkemávssus lea stuorra váikkuhus, Jaakko Haapakoski dadjá.

Guolleváriiddikšunmáksu lea bákkolaš vuođđomáksu buohkaide 18-69-jahkásaččaide vuogga- ja bivddusguolásteaddjiide ja reabbábivdiide. Máksingeatnegasvuohta ii guoskka daid, geat olahedje máksofriddjavuođa boares lága áigge dahjege devde unnimustá 65 jagi 31.12.2023 rádjai.

Guolleváriiddikšunmávssu hálddašeaddji sáhttá guolástit ovttain stákkuin ja vuokkain olles Suomas; mearas, jávrriin, ládduin ja jogaid savvonguovlluin. Guolleváriiddikšunmávssu sáhttá lotnut kaleanddarjahkái, vahkkui (čieža jándora) dahje jándorii.

Jándormávssuid mearri lea šaddan duppalin 2020-logus badjel 80 000 máksui jagis. Jahkemávssuid mearri lea lassánan dušše mášolaččat.

Jagi 2027 guolleváriiddikšumávssuid vuovdin álgá Meahciráđđehusa Eräluvat.fi-bálvalusas 30. skábmamánu 2026. Jagi 2027 guolleváriiddikšunmáksu máksá 47 euro kaleanddarjagis, 16 euro čieža jándoris ja 6 euro jándoris.

Lassedieđut:

Guollebivddu spesiálaáššedovdi Jaakko Haapakoski, Meahciráđđehus, 040 190 8717