Giehtaruohttasa meahccejohtalussii oktasaš doaibmavuogit

Boazodoalu, turismafitnodagaid ja Meahciráđđehusa gaskkas joatkit jeavddalaš oktavuođadoallama. Lassin ordnet jahkásaččat ovttasbargodeaivvadeami, mas geahčadit vássán ja boahttevaš baji ja áigeguovdilis áššiid.

Johtolagaid beaiváduvvon luoddaevttohusaid joatkkaválmmaštallat bargobáji linnjemiid vuođul. Kárttat beaiváduvvojit ja doaimmahuvvojit bálgosa gieđahallama maŋŋá guovllu fitnodagaide. Mihttomearrin lea heivehit oktii boazodoalu dárbbuid ja turismafitnodagaid doaibmaeavttuid.

Safáridoaimmas gárgehat oktasaš kvalitehta- ja dorvvolašvuođakritearaid mas deattuhat báikkálašoahpisvuođa, dorvvolašvuođačehppodaga ja vásttolašvuođa. Lassin válmmaštallat geavadagaid ođđa fitnodagaid doaimma árvvoštallamii, ofelaččaid čehppodaga doarjumii ja bearráigeahču nannemii.

Gulahallan ja oktavuođadoallan nannejuvvo

Giehtaruohttasa meahccejohtalusa gulahallanplána mihttomearrin lea fállat fitnodatdoalliide, iešráđálaš skohtervuoddjiide ja eará guovllu geavaheaddjiide rivttesáigge ja oktilaš dieđu. Gulahallan nannejuvvo neahttasisdoaluiguin, ođasreivviiguin, oahpistantávvaliiguin ja čuozihuvvon čanusjoavkoovttasbargguin.

”Bargobáji deháleamos boađus lei oktasaš oaidnu das, ahte čovdosiid sáhttá hukset ovttasbarggu bokte. Gávnnaimet geavatlaš vugiid buoridit dieđujohtima, aiddostahttit johtolagaid ja nanosmahttit dorvvolašvuođa nu, ahte boazodoalu, turismma ja luonddu dárbbut váldojuvvojit vuhtii buorebut. Sohppojuvvon doaibmabijut ovddidit konkrehtalaččat ovddidanbarggu”, dadjá dilálašvuođa jođiheaddji, bálvalanoamasteaddji Elina Odé Meahciráđđehusa Luonddubálvalusain.

Bargobáji bohtosiid ávkkástallat Giehtaruohttasa mohtorfievrruid meahccejohtalusa joatkkaválmmaštallamis sihke doaibmamálliid ja lohpegeavadagaid ovddideamis. Bargobádjái oassálaste 36 olbmo, geain bealli gáiddusoktavuođaid bokte.

Lassedieđut

• Meahciráđđehus, Luonddubálvalusat, meahccejohtalusbálvalusoamasteaddji Elina Odé, elina.ode@metsa.fi.