Pâʹjj-Lappi määusteʹmes kueʹllšeeʹllemlooʹvi ooccmõš älgg 2.1.2026

Lååʹpp oudd vuõiggâdvuõđ vuäggam-muõrr- da šiilkueʹllšeellmõʹšše valdia čääʹccvuuʹdin luõzz da kuuʹǯ kaggõõttâmvuuʹdid lokku väälǩâni. Looʹvid jeäʹla veâl raajjâm mieʹrrtuʹmmstõõǥǥid, de looʹvid vuäǯǯa haaʹleʹmmen puk pääiklaž aassi. Jeänõõǥǥ, Aanar da Uʹccjooǥǥ kåʹddaassi vueiʹtte ooccâd määusteʹmes kueʹllšeeʹllemlååʹv valdia čaaʹʒʒid vuõss-sâjjsânji jiijjâs kååʹdd voudda.

Määusteʹmes luâttvuejjamlooʹvi ooccmõš lij juʹn jåttjam, leša kueʹllšeeʹllem ooccmõš vuäʹrdd veâl säʹmmlaž dommvuuʹd kueʹllšeeʹllem mieʹrrtuʹmmstõõǥǥ, koon õlmstâʹtte rosttovmannu poddân. 

Pâʹjj-Lappi määusteʹmes kueʹllšeeʹllemlååʹv ij taarbaš vueʹlǧǧed viǯǯâd jeäʹrbõʹžžen koʹst-ne tåimmpääiʹǩest. Lååʹv vuäitt ooccâd liâđǥlânji ođđeeʹjjmannu 2. peeiʹv 2026 ääʹljeen vuõss-sâjjsânji Eräluvat.fi -kääzzkõõzzâst. Jõs ääʹššlaž ij vueiʹt ooccâd lååʹv liâđǥlânji, son vuäitt ooccâd lååʹv soiʹttjeeʹl Erälupa kääzzkõsnââmra  020 69 2424 (arggan čiâss 9–15). Mââimõõzzâst lååʹv ooccmõš lij vueiʹtlvaž še Tuõddâr-Lappi luâttkääzzkõõzzâst da Aanar ääʹššlažkääzzkõõzzâst.

Looǥǥ lââʹss kåʹddaassi kueʹllšeeʹllemvuõiggâdvuõđin Pâʹjj-Lappist

Ooʒʒ määusteʹmes luâttvuejjamlååʹv (Jeänõk, Aanar da Uʹccjooǥǥ aassi)