12.12.2025
Paje-Laapi mávsuttes kuálástemluuvij uuccâm álgá 2.1.2026
Iänuduv, Aanaar já Ucjuv kieldâi ässeeh pyehtih haahâđ mávsuttes kuálástemluuvijd äigipajan 2026–2028 tállân ive mulsâšuddâm maŋa uđđâivemáánu 2. peeivi 2026 rääjist. Ovdeláá mieđettum loveh láá ton räi vyeimist. Paje-Laapi kieldâi ässei meccijotolâhluuvijd puáttee iivij várás puáhtá jo uuccâđ.
Lope addel vuoigâdvuođâ stággu- já pivduskuálástem várás staatâ čäcikuávluin luosâ já kuávžur kuárŋumvijđoduvâid fáárun luvâhánnáá. Loveh iä lah juohhum tiätumeerijd, já nuuvtpa love finnejeh táátus mield puoh páiháliih. Iänuduv, Aanaar já Ucjuv kieldâi ässeeh pyehtih uuccâđ mávsuttes kuálástemlove staatâ čassijd vuosâsajasávt jieijâs kieldâ vijđodâhân.
Mávsuttes meccijotolâhluuvij uuccâm lii jo joođoost, mut kuálástemluuvij uuccâm vuordâš vala sämmilij päikkikuávlu kuálástem tiätumerimiärádâs, mii almostittoo juovlâmáánu ääigi.
Paje-Laapi mávsuttes kuálástemlove ij taarbâš innig vyelgiđ viežžâđ sierâ mongin toimâsaajeest. Love puáhtá uuccâđ šleđgâhäämist uđđâivemáánu 2. peeivi 2026 rääjist vuosâsajasávt Eräluvat.fi-palvâlusâst. Jis äššigâs ij pyevti uuccâđ love šleđgâhámásávt, te sun puáhtá uuccâđ love suáittimáin Eräluvat palvâlemnumerân 020 69 2424 (argân tijme 9–15). Love uuccâm lii ain-uv máhđulâš meid Tuodâr-Laapi luándukuávdáást já Aanaar äššigâspalvâlmist.
Luuvâ lase kieldâässei kuálástemvuoigâdvuođâin Paje-Laapist
Uusâ mávsuttes meccijotolâhlove (Iänuduv, Aanaar já Ucjuv ässeeh)